يا يراعي دردع مدادك ولا تشكي عضيله
عالحياده تخوز همي صدق وتفك العضايل
ترجم حروف وعاها القلب من فرقا خليله
من فراق اللي تسيد فوق هامات الطوايل
صادق تخضع له الأبيات ثم تركع ذليله
ماينقي إلا السمان ولا ترا عنده هزايل
بالكلام سبكه حبيك ولا بعد يوجد مثيله
ولا أظن يكون في عصره شبيه ولا مثايل
إن نطق ماجامل ولا له بعد عيله وميله
لي في قلبه دوم على لسانه ولو تزعل قبايل
ويل قلبن طار من فرقا مريض الموت شليله
يوم لبى زقرة الباري وثم شد الرحايل
ذاك جدي الفذ كساب الجميله
إنشدوا عنه الغيوم الغر ومزون المخايل
مفرداته إن تكلم يبهت عقول ثقيله
وإن تغزر يعجز الفاهم عن حلول المسايل
كم رمسنا وياه بين السمر لي مايل ضليله
وكم رزفنا يوم كان الغي مخطور النزايل
وكم تلاقينا وكم كلنا وياه وكم ليله
وكم تبعنا الودق يوم السيل بالخيرات سايل
وكم ضحكنا وياه يوم الناس بالضحكه بخيله
ياعسى يضحك بجنات بها غروس طوايل
عظم الله أجر حذف لي غدت ثكلى مليله
يوم راح اللي ملبسها من أشعاره مثايل
وياعسى تسقى ثرى قبره السحب في كل ليله
لين مخضر العشب يذريه عن حر القوايل
ويا إله العرش سبحانك سالك بالفضيله
ترحمه وتغمده في جنتك ياذو الفضايل
،،،يرحمه ربي،،
